Фаил Камаев: «Милли тәрбия – сезнең вазифаи бурычыгыз»

Айрат Ибраһимов тәрбия һәм белем бирү учреждениеләрендә ирешелгән уңышлар, 2020-2021 уку елы нәтиҗәләре һәм 2021-2022 уку елында мәгариф хезмәткәрләре алдында торган төп бурычлар, хәл ителергә тиешле проблемалар  турында сөйләде.
– Быелгы уку елында 3918 укучы парта артына утырачак, шуның 501е беренче сыйныфлар. Балалар – безнең киләчәгебез. Киләчәгебез яхшы булсын өчен югары дәрәҗәдә белем һәм тәрбия бирергә тиешбез. Бу җаваплы вазифаны үз эшенә чын күңелдән бирелгән профессионаллар гына җиренә җиткереп башкара ала. 28 мәктәпкәчә белем һәм тәрбия бирү учреждениесендә эшләүче 179 тәрбияченең – 143е (79 проценты), 23 мәктәптә эшләүче 402 педагогның 391е (98 проценты) югары белемле. Замана таләпләренә җавап бирә алучы балалар тәрбияләү өчен мәктәпләрнең фән укытучылары белән тулысынча тәэмин ителүе кирәк. Кадрлар җитмәү проблемасы бар – соңгы биш елда 108 укытучы эштән китте, алар урынына 88 кеше килде. Мәктәпләргә яшь кадрларны җәлеп итүнең яхшы ысуллары бар. «Сала укытучысы» федераль программасы кысаларында Бәтке мәктәбенә башлангыч сыйныф укытучысы Зөлфия Рамазанова эшкә килде. Быелгы уку елыннан авыл мәктәпләрендә төрле фән буенча 6 яшь укытучы эшли башлаячак. Балалар бакчалары һәм мәктәпләрдә балаларның интеллектын үстерү өчен шахмат зонасы булдырылды. Быелгы уку елыннан барлык рус мәктәпләрендә татар сыйныфлары ачу йөкләнде. Барлык белем бирү мәктәпләре 100 процент югары белемле татар теле һәм әдәбияты укытучылары белән тәэмин ителгән, – диде. 
Район башлыгы Фаил Камаев чыгышын һәр милләткә, һәр заманга  кагылышлы төп проблемадан башлады.
– Тәрбияле бала – иң зур байлык, җәмгыятьнең нигезе. Киләчәк тормышыбызның бәхетле булу-булмавы педагоглар эшчәнлеге белән тыгыз бәйләнгән. Сез – халык тәрбиячесе. Уртак максатларга ирешү өчен педагоглар белән ата-аналар тыгыз элемтәдә торырга тиеш. Тәрбия – үз халкыңны, милләтеңне, туган телеңне хөрмәт итү, аны ярату һәм гореф-гадәтләрне саклау ул. Милли тәрбия, туган телгә мәхәббәт тәрбияләү – сезнең вазифаи бурычыгыз. Балаларны яраткан, үз җиренә, халкына ихлас хезмәт иткән педагог бу мөһим мәсьәләгә битараф булмый. Безнең җирлек үзенчәлекле. Шәһәр яны районы булганлыктан, балалар бакчасында, мәктәптә төрле милләт вәкилләре белем һәм тәрбия ала. Һәр милләт үз телен белергә, өйрәнергә тиеш. Моның өчен бездә мөмкинлекләр тудырылган. Шулай булуга да карамастан, мәктәпләрдә татарча белем бирү яхшы куелган дип әйтеп булмый. Ни кызганыч, поселокларда татар гаиләсендә тәрбияләнүче бала көнкүреш дәрәҗәсендә генә булса да милләттәше белән туган телендә аралаша алмый. Акыл культурасын, интеллектны үстерү өчен иң элек үз телеңне белергә, аннары дәүләт телен һәм шуңа өстәп, чит тел өйрәнергә кирәк. Балалар бакчасында һәм башлангыч звенода бала татарча белем һәм тәрбия ала икән, ул милли мирасыбызны, рухи байлыгыбызны буыннан буынга тапшыра алачак. Моны ата-аналарга яхшылап төшендерегез. Кеше гомере буе белем алырга, камилләшергә тиеш. Юкка гына, бөтен нәрсәдән хәбәрдар булган кеше дөнья белән идарә итә, димәгәннәр. Һәр яңалык тәрбияле кеше кулында булырга тиеш. Кешенең белеме булып та, тәрбиясе булмаска мөмкин. Бу начар нәтиҗәләргә китерә. Безнең районда халык саны арта бара – бүген 44 мең 600 кеше теркәлеп яши. Ә теркәлмәгәне күпме? Балалар бакчалары, мәктәпләр төзү, авыл хуҗалыгы белгечләре әзерли торган уку йорты ачу – көнүзәк мәсьәлә. Заманадан бераз алда бару өчен балаларга төпле белем бирү кирәк. Бәткедә фәннәрне тирәнтен өйрәнү класслары эшли. Башка мәктәпләр дә шул юнәлешне алачак, – диде һәм август киңәшмәсендә катнашучыларны яңа уку елы башлану белән тәбрикләде, уңышлар теләде. 
Киңәшмәдә мәгариф өлкәсендә уңышларга ирешкән педагогларга, тәрбиячеләргә, ветеран укытучыларга тантаналы төстә хөкүмәт бүләкләре тапшырылды. Яшь белгечләрне район укытучылары сафына кабул итү аеруча җылы шартларда узды. 

 / Рамил Зәкиев фотосы.