Дәүләт программалары – гамәлдә

2024 елның җәендә – укучылар каникулда чагында, Калмаш  авыл җирлегендә эшләп килүче гомумбелем бирү мәктәбе ашханәсенә Дәүләт программасы буенча капиталь ремонт ясалды. Мәктәп ашханәсенә өр-яңа заманча  җиһазлар, инвентарь, кухня-кирәк яраклары һәм мебель куелды. Ашханәнең ризык әзерләү блогы, туклану залы – затлы, күңелгә ятышлы һәм, иң мөһиме, уңайлы. Июль аенда бирегә килгәндә, дөресен генә әйткәндә, элекке ашханәнең ялангач диварларын һәм тыз-быз эшләп йөрүче ремонт бригадасын күргән идек. Кыска вакыт эчендә зәвыкъ белән ремонтланган, җиһазланган ашханә барлыкка килгән. Укучылар ашханәдә тукланырга атлыгып торалар. Биредә өй атмосферасы тудырылган. Һәр җирдә чисталык-пөхтәлек. Иртәнге якта, иң беренче, башлангыч сыйныф укучылары, аннары урта звено һәм өченче төркемдә – югары сыйныф укучылары туклана.

Башлангыч сыйныфта укучы балалар беркатлы, риясыз була. Алар самими хисләрен белдерергә кыенсынмый. Башлангычлардан берничә кыз мәктәп ашханәсендә эшләүче аш-су остасына рәхмәтләрен үзләренчә белдерделәр. Алар пешекчене иңнәреннән кочып: «Бик тәмле булды, рәхмәт апа!» дип ихластан рәхмәт әйттеләр. Аш-су әзерләүче Айгөл Хафизова: «Тәрбияле балаларны сыйлау – җан рәхәте. Педколлективка рәхмәт, ихтирамлылар. Мәктәп директоры Венера Хаҗиәхмәтовна – таләпчән, гадел һәм кешенең хезмәтен күрә, бәяли белә торган җитәкче. Кулдашым Наташа Шәйдуллина белән Яңа поселогыннан килеп эшлибез. Йөреп эшләвебезгә зарланмыйбыз. Биредә педколлектив – дус-тату, һәр кешегә хөрмәт белән карый. Алар – үз эшләрен, ә без үзебезнекен беләбез. Биредә тырнак астыннан кер эзләмиләр. Үзара хөрмәт булгач күңел тыныч. Меню төрләндерелә. Аны “Мәктәп туклануы” төзи. Балалар пылау, кәтлит белән карабодай боткасын, бәрәңге измәсе белән балык кәтлитен яратып ашыйлар. Эчемлекләрдән компот, кесәл, чәй һәм десертка камыр ризыгы әзерлибез. Кирәк булганда, аеруча камыр ашлары әзерләгәндә, таңнан торып эшкә киләм. Аш-су әзерләргә бик яратам. Тыныч атмосферада ризык әзерләү рәхәт», – ди. Пешекче Наташа Шәйдуллина да, табак-савыт юуучы Огылхан Колмәтова да Айгөлне хуплап тордылар һәм:  «Без кунак яратабыз, тагын килегез», – дип озатып калдылар.

Калмаш гомумбелем бирү мәктәбендә 2024-2025 уку елында биология, химия, физика кабинетлары яңартылды, «Үсеш ноктасы» («Точка роста») Дәүләт программасы буенча заманча уку әсбаплары, техник чаралар белән җиһазландырылды. Заман таләпләренә тулысынча җавап бирә торган ашханә һәм фән кабинетлары яңа уку елына әзер булды. Заман таләпләренә туры китереп эшләнгән ашханә өчен  республика бюджетыннан 7,3 млн. сум һәм «Үсеш ноктасы» программасы буенча кабинетларны җиһазлау өчен 1.1 млн. сум акча бүлеп бирелде.

Калмаш гомумбелем бирү мәктәбе директоры Венера Кашапова: «Конкурентлыкка сәләтле гражданнар тәрбияләү өчен заманнан бер адым алда бару кирәк. ”Үсеш ноктасы” Дәүләт программасы буенча яңартылган кабинетлар белем бирү һәм алуда күп яктан уңайлыклар тудырды. 

Шунысын да әйтергә кирәк, укучыларның белем алуга омтылышлары, фәннәргә карата кызыксынулары бермә-бер артты. Алар мәктәпкә ашкынып киләләр, чөнки бар яклап та шартлар тудырылган. Бары тик укырга, укырга һәм укырга гына», – ди кырык елга якын педагогик эш стажы булган Венера Кашапова. Ул 1986  елны Алабуга педагогия институтының математика факультетын тәмамлагач Яр Чаллыда укучыларга математикадан белем бирә. 2012 елда Калмашка килеп эшли башлый һәм унбер ел завуч була. Икенче ел директор вазыйфасын башкара.

Физика укытучысы Рәйсә Садриева яңартылган кабинетта 9 нчы сыйныф укучыларына дәрес бирә иде. Укучылар: «Физикадан лаборатор эшләр өчен күп кенә комплектлар кайтты. Яңа приборлар барыбызга да җитәрлек булгач бик уңайлы. Алар һәрберсе уңайлы савытларда, әйбәт итеп төрелгән. Бу – вак мәсьәлә кебек тоелса да, эштә комфорт тудыра. Ремонт ясалган кабинетка керәсе килеп тора», – дип шатлыклары белән уртаклаштылар.