Бергәләп үсәрбез

Үткән җомга Кече Шилнә авыл җирлеге янәшәсендә урнашкан урман полосасы сизелерлек киңәйде – биредә 3 мең төпкә якын нарат утыртылды. Бу игелекле эшкә Тукай районы башлыгының инвестицион проектлар буенча урынбасары Илфак Бариев, Кече Шилнә авыл җирлеге коллективы, мәктәп директоры, укытучылар, өлкән сыйныф укучылары, «Бердәм Россия» партиясе вәкилләре, Чаллы шәһәре педагогия институтының «Эко-отряд» хәрәкәте әгъзалары һәм башка үзләре теләп килгән кешеләр кушылды. Барлыгы 70тән артык кеше җыелды.
2017 елда әлеге урман каты давылдан зыян күргән булган – сау-сәламәт агачлар сынган, ауган. «Шуңа күрә югалтуларны тулыландыру – мөһим чара», – ди Алабуга урманчылыгының Тукай районы участок урманчысы Ирек Сафин.
Нарат үсентеләре Алабуга урманчылыгыннан китерелде. Акциядә катнашучылар әлеге үсентеләрне саклап, тиешле таләпләргә туры китереп утыртырга тырышты. Урман аланы ул көнне кырмыска оясын хәтерләтте: кемдер чокыр казый, кемдер агач утырта, кемдер су ташый. Урманчылар эшнең башында торды. Бу аңлашыла, алар бу эштә үрнәк булырга тиеш. Ике сәгать эчендә берсеннән-берсе матур кечкенә наратлар рәт-рәт булып тезелде.
– Мин әлеге акциядә катнашуыма бик шат, күңелдәге хисләрне әйтеп аңлатырлык түгел. Наратларны классташлар белән карап, су сибеп торырбыз, – ди 10нчы сыйныф укучысы Дмитрий Ногуманов.
– Мин ел да әлеге акциядә катнашам. Еллар үткәч, балаларыма һәм оныкларыма бу аланда мин утырткан агачлар турында сөйләячәкмен, – ди 8нче сыйныф укучысы Гүзәл Ягъфәрова.
Акция барышында, үсентеләр утыртылудан тыш, урман территориясе чүп-чардан чистартылды, шулай ук корыган агачлар киселеп өемнәргә өелде.
– Әлеге акциянең максаты урманнарны үстерү генә түгел, ә киң җәмәгатьчелектә аңа карата сакчыл караш тәрбияләү, игътибарны «табигатьнең яшел үпкәсе»н саклау проблемаларына юнәлтү дә. Агач күбрәк булган саен экологик хәл дә яхшыра бит, – ди Ирек Сафин.