Азык-төлек белән агуланмагыз 

Җәй җитү белән шәһәрләрдә сәүдә оешмаларыннан, базарлардан, ярминкәләрдән тыш, урамнарда вак сату урыннары эшли башлый. Халык шәхси хуҗалыкларда җитештерелгән яшелчә, җиләк-җимеш, сөт продукцияләре, консервланган ризык, елга-күлләрдә тотылган балык һәм азык-төлек белән сату итә. Бу төр сату законлы түгел, шуңа да ул тыелган. Ләкин халык, үз сәламәтлегенә куркыныч янавын исәпкә алмыйча, урамнарда, кибет алларында, машинадан азык-төлек алуын дәвам итә. Мондый сәүдә «нокталарында»гы азык-төлекнең сыйфатын тиешле органнар контрольдә тота алмыйлар. Урамда санкцияләнмәгән урыннарда сату итүче кешеләр медицина тикшерүе үтмәгәннәр һәм аларның сату-алу эше буенча тиешле гигиеник белемнәре дә юк. Шуңа күрә алар санитария-гигиена кагыйдәләрен үтәмиләр. Җәйге эсседә тиз бозыла торган азык-төлекне суыткычта тотмыйлар. Димәк, температура режимы бозыла, ризыкны саклау шартлары үтәлми, азык-төлекнең сыйфаты һәм кайдан алынганы турында белешмәләре юк, сатучының сәламәтлеген беркем дә контрольдә тотмый.
Роспотребнадзорның территориаль бүлеге санкцияләнмәгән урыннарда сатылган продукциянең эпидемиологик яктан куркыныч булуын искәртә. Мондый азык-төлек массакүләм инфекцион чирләргә һәм азык-төлек белән агулануга (дизентерия, сальмонеллез, ботулизм һәм токсикоинфекция) сәбәп була. 
Үзебезнең, якын-нарыбызның сәламәт-легенә битараф булмыйк! Ризык сатып алганда тагын бер кат уйлыйк. Шунысы да бар – тиешсез урыннарда сату итүчеләрдән алган сыйфатсыз әйбер өчен хокукыгызны яклап бер җиргә дә мөрәҗәгать итеп булмый.