Әтиемнең шанлы гомеренә һәйкәл булып яши авылы
«Галиәхмәт 1926 елның 1 октябрь көнендә Чебенле авылында өченче бала булып дөньяга килә. Гаиләдә 6 бала үсәләр. Әтисе балыкчы була. Тырышып эшләү-яшәүләре, таза тормышлы булулары аркасында, утызынчы ел шаукымы алар гаиләсенә дә кагыла: булган ат, сыерларын, хуҗалык әйберләрен, сарайларын сүтеп алып чыгып китәләр. Әтисе Хаҗиәхмәт Бондюгка качып чыгып китеп кенә исән кала, соңыннан кире кайтып колхозга керә. Галиәхмәт: «Өйгә тикшерү белән ниндидер кешеләр килгәч, миңа ике кат киндер күлмәк, ыштан кидереп Ык буена төшереп җибәрделәр», – дип сөйли иде.