«Кырлай» әдәби чәйханәсендә

Китап – ул җан азыгы, диләр. Шуңа күрә китапханә дә ашханә формасында әзерләнгән иде. Биредә кунаклар «кабымлык», «коктейль», «кайнар аш» белән «сыйландылар». «Кабымлык»тан – газета-журналлардан Габдулла Тукай турында язмалар укылды, «коктейльләр» – Тукай мәсәлләре, аның бишек җырына «Ак чәчәк» балалар бакчасы кызлары курчаклар белән биеделәр. «Кайнар аш»ка «Урман бәлеше» тәкъдим ителде – Теләнче Тамак авылы мәдәният йортында эшләп килүче «Алтын битлек» балалар театры төркеме «Тукай әкиятләре» постановкасын күрсәттеләр. «Бәлеш»тән соң, әлбәттә, «чәй» чыгарылды – ясалма чынаякларга Тукайның «Китап» шигыре язылган иде. Шигырьне укучылар марафон формасында укыдылар.
Габдулла Тукай әсәрләрен бу чәйханәдә «авыз итү» бик тәмле һәм файдалы булды. Аның тәме балачактан бик затлы җан азыгы булып гомерлеккә истә калыр.

Рамилә СӘГЪДИЕВА,
авыл китапханәчесе.

Фото автордан алынды.