Матур гомер бәйрәме

Яңа Мусабай авылында яшәүче тыл һәм хезмәт ветераны Мөнҗия Шәймәрдановага 18 март көнне 90 яшь тулды. 1961 елда дүрт балага әни булып килгән ул. Бишенче булып уртак балалары туган. Сабыйларының бишесен дә тигез күреп, җил-яңгыр тидермичә үстергән, кеше иткән. Бүген ул балаларның, оныкларның иң якын һәм иң кадерле кешесе. Матур гомер бәйрәмен дә, елдагыча, балалары һәм оныклары белән бергә каршылый. 
Юбилее көнне Мөнҗия апаны котларга район башкарма комитеты җитәкчесенең социаль мәсьәләләр буенча урынбасары Илфак Бариев, Түбән Суыксу авыл җирлеге башлыгы Флүр Ихсанов, мәдәният йорты һәм китапханә хезмәткәрләре килде. Мөнҗия апа Шәймәрдәновага Бөек Җиңүнең 75 еллыгы уңаеннан юбилей медале тапшырылды. 
Бала чагы һәм яшьлеге авыр елларга туры килгән бик күп замандашлары кебек, аңа да күп кыенлыкларны кичерергә, авырлыкларны җиңәргә туры килгән. Әмма ул сынмаган, сыгылмаган. Күңелен каралтмаган, шуңа күрәдер, йөзе дә ачык. Мөнҗия апабызның, өлкән яшьтә булса да, зиһене үткен, хәтере дә әйбәт әле. Ул авылыбызда һәм илебездә булган вакыйгалардан хәбәрдар, яңалыклар белән кызыксынып тора. Мул табынлы өстәл артында без аның үткәннәре һәм бүгенге тормышы турында сөйләшеп утырдык. Бәйрәм белән котлап килгәннәре өчен Мөнҗия апа кунакларга рәхмәт әйтеп, алдагы елларда да матур очрашулар теләп калды. 

Ләйсән Нигъмәтуллина.
Түбән Суыксу авылы.

/ Фото Ләйсән Нигъмәтуллинадан алынды.