Алдынгы терлекче дә, дүрт баласының яраткан әнисе дә

Любовь Ильинична әлеге предприятиегә 29 ел элек килә. «Татарстан» совхозы поселогында туып-үскән кыз мәктәпне тәмамлаган җәйне үк эшләп карау нияте белән дуңгызчылык комплексының ишеген шакый. Аны дуңгыз караучы-оператор итеп алалар. Ул вакытта әле алдагы бик күп елларны шушы комплекска багышлармын дип уйлап та карамый. Хәзер Любовь Ильинична балалату участогында эшли. «Эшем, әлбәттә, җаваплылык таләп итә. Һәр яңа туган мал өчен борчылабыз. Терлекләрне яратмасаң, бездә эшләп булмый. 30 елга якын бер үк хезмәт. Эшемнең аерып кына әйтерлек үзенчәлекләрен дә тапмыйм. Эшлибез, тырышабыз», - ди ул тыйнак кына. Сүз кешесе түгел, эш кешесе икәнлеге, төгәллеге, пөхтәлеге, һәр җирдә тәртип яратканы үз-­үзен тотышыннан ук күренеп тора.

Хезмәттәшләре дә аны югары һөнәри осталыгы, нинди эшкә алынса да, үзен тулысынча шуңа багышлаганы өчен хөрмәт итәләр. Һәм бу сыйфатлары аның дәрәҗәсен көннән-көн күтәрүен билгеләп үтәләр. Шулай ук Любовь Ильинична күп еллар дәвамында туплаган тәҗрибәсен комплекска килгән яшьләргә дөрес һәм үтемле итеп җиткерә белә, кирәк урында акыллы киңәшләрен бирә.

Хезмәттәге югары уңышлары өчен Любовь Ильинична күп тапкырлар Рәхмәт хатлары белән бүләкләнгән. Аның үз эшен тырышып башкаруы нәтиҗәсендә 2011 елдан 2013 елга тулаем артым 563тән 960 центнерга кадәр күтәрелгән. 2014 елның җиде аена бу күрсәткеч 460 центнерны тәшкил иткән. 2011 елда 5270 баш дуңгыз баласы алынса, 2013тә ул сан 8984 баш булган.

Алдынгы терлекче генә түгел, гаиләдә дә уңган хатын, дүрт баласының яраткан әнисе Любовь Ильинична. Ике балалары инде мәктәпне тәмамлап, тормышта үз юлларын сайлаганнар, кечеләре - игезәкләре Кнәз урта мәктәбенең алтынчы сыйныфына бара.