Комбайннарның әзерлеген тикшерделәр

Урып-җыюда катнашачак һәрбер комбайн район башлыгы Фаил Камаев җитәкчелегендәге комиссия тарафыннан җентекләп тикшерелде. Иң беренче чиратта комбайннарның герметиклыгы – бункерлардан бөртекнең коелу-коелмавы каралды. Аннары техник торышны күзәтү идарәсеннән рөхсәт кәгазьләре барланды, кабиналардагы тәртип, куркынычсызлык чаралары (сигнал бирү җайланмасы, ут сүндергеч булу, фараларның төзеклеге) тикшерелде. Шулай ук комбайннар белән килгән янгын сүндерү машиналарының торышына, механизаторларның өстендә махсус форма булуына игътибар ителде.
Район авыл хуҗалыгы һәм азык-төлек идарәсе башлыгы Ренат Хәсәновның сүзләренчә, быел сигез хуҗалыкның да әзерлеге югары дәрәҗәдә. Моны исәпкә алып, комбайнчыларга һәм аларның ярдәмчеләренә урында ук премияләр тапшырылган. 
2019 ел уңышын җыюга әзерлек буенча авыл хуҗалыгы оешмалары арасында конкурс кысаларында җомга көнне районга башкаладан комиссия килә. Ул район хуҗалыкларында, комбайннардан тыш, ашлык складларының, ашлык киптерү җайланмаларының, ашлык чистарту машиналарының төзеклеген, шулай ук тракторларның һәм тагылма агрегатларның туфрак эшкәртүгә әзерлеген, хезмәтне саклау кагыйдәләренең үтәлешен тикшерәчәк. 
Белгечләр фаразлавынча, урак июль ахырында башланыр дип көтелә.