Үрнәк гаилә – ныклы җәмгыять

Һә р  г а и л ә н е ң  ү з традицияләре, горефгадәтләре бар. Аннары, гаилә ул тугрылык, хөрмәт, бәхет һәм күңел тынычлыгы чыганагы. Шунысы куанычлы, авылыбызда озак еллар буе парлашып, тәрбияле б а л а л а р ү с т е р г ә н гаиләләребез шактый.  Ел дәвамында, җирлектә яшәгән шундый  матур парлар белән кызыклы очрашулар да уздырылды. Һәр елдагыча, быел да без юбиляр парларны котлауны районның ЗАГС бүлеге җитәкчесе Эльвира Ринат кызы Мостафина, район ветераннар һәм инвалидлар оешмасы җитәкчесе Фәйрүзә Фаяз кызы Вәҗиева һәм авыл җирлеге башлыгы Гөлүзә Гаяз кызы Минакова белән бергәләп оештырдык. Алдан ук аларга олы рәхмәтләребезне җиткерәбез. Кеше тормышы ачылмаган серле китап бит ул. Менә шуны истә тотып, үткән 2024 ел дәвамында авылыбызда яшәгән матур гаиләләрдә кунакта булып, аларны бәйрәмнәре белән котлап, бүләкләр тапшырдык, сәламәтлек һәм бәхетле тормыш теләдек. Җирлегебездә шундый матур, үрнәк булырдай, искитәрлек гаиләләр шактый. Әйтик, тыл ветераны, оста пыялачы Мулланур абый Шәһелгәрәев белән олы йөрәкле, уңган ханым – Камал апалар 70 ел бергә яшиләр! Аларның бер-берсенә булган ихтирамы сокланырлык. 55 ел парлап гомер кичерүче оста куллы, эшчән Мирзанур Муллануров белән «Ана даны» медале иясе Халисә апаларның бергәләп үстергән тәрбияле балалары, оныклары – барыбызга да үрнәк!

50 ел гомер кичерүче парлар – югары категорияле тәрбияче, белемлезирәк Римма ханым  һәм  техника белгече Рәшит Габдуллиннар, сабыр, зыялы, уңган, тыйнак Хөршидә ханым белән  танылган игенче Өлфәт Галиевлар, күркәм холыклы, затлы Флүзә ханым  һәм 3 нче дәрәҗә «Хезмәт даны» ордены иясе Гаяз Гәрәевләр гаиләсе, Россия Федерациясенең «За трудовую доблесть» медале иясе Мөслимә ханым һәм «За трудовую доблесть» медале иясе Әсгат Сабировларның гаиләләренең дә тормыш китаплары бик эчтәлекле һәм кызыклы. Аларның һәммәсенә яңа елда да иминлек, сәламәтлек, тигезлек, матур парлы тормыш һәм оныклар игелеге телибез! Флүзә Салимова, Боерган башлангыч ветераннар һәм инвалидлар оешмасы рәисе, китапханә мөдире.