«Милли бизәк – хатын-кыз күрке»

Чарага Яр Чаллы шәһәрендә рәссамнар тарафыннан оешкан “Ак калфаклар-рәссамнар” төркеме килде. Бу төркем якташыбыз, Россия һәм Татарстан Республикасы рәссамнар берлеге әгъзасы - Рауза Латыпова-Иванова Габдраким кызы тарафыннан булдырылган һәм “Ак калфак” Бөтендөнья татар хатын-кызлары иҗтимагый оешмасы белән берлектә эшли.

Тамашачылар килүгә мәдәният йорты залы күз явын алырлык кул эшләре белән балкып тора иде. Монда хатын-кызның эчке матурлыгын, рухи байлыгын чагылдырган берсеннән-берсе матур калфаклар, изүләр, чиккән картиналар, бизәнгечләр күрсәтелгән иде.

Рауза Габдраким кызы тамашачыларны хатын-кызлар өчен теккән үзенчәлекле күлмәкләре белән таныштырды, татар хатын-кызларына гына хас булган киемнәрнең тарихы турында сөйләде. Киң күңелле Рауза ханым оештыручыларга үзенең картиналарын да бүләк итте.

Татарстан Республикасы рәссамнар берлеге әгъзасы - Гареева Хәния Гыйлметдин кызы - чигү осталыгы белән дә дан казанган. Ул да үзенең кул эшләре күргәзмәсе белән таныштырды. Әлеге экспозициядә тамбурлы җөй белән башкарылган чигүләр зур урын алып тора. Хәния ханым әйтүенчә, мондый җөй чигүдә болгар заманнарыннан ук актив кулланыла, шул ысул белән кием-салымның аерым элементлары, хатын-кызлар һәм ир-ат баш киемнәре, сөлгеләр, мендәрләр, бизәнү әйберләре бизәлә. Шунысы мөһим, Хәния ханымның мөләемлеге, эчке матурлыгы аның барлык эшләрендә дә чагыла кебек.

Сабирова Наилә Абдул кызы - Татарстан Республикасы рәссамнар берлеге әгъзасы, шулай ук чигү остасы. Ул киемнәрдәге милли бизәкләр - безгә әби-бабаларыбыздан калган иң кадерле бүләк, аны кадерләп саклый да белергә кирәклеген белдерде.

Мазитова Тәслия Әмирхан кызы - Татарстан Республикасы рәссамнар берлеге әгъзасы. Тамашачыларны сәйлән белән эшләнгән зәвыклы картиналары, каен тузыннан ясалган курчаклары белән шаккарттырды. Үзенчәлекле калфаклары, изүләре дә тамашачыларда аеруча кызыксыну уятты.

Абзалова Галия Мөнәвир кызы - Татарстан Республикасы рәссамнар берлеге әгъзасы – безгә куннакка Сарман районыннан килгән. Күптән түгел генә “Ак калфаклар” оешмасына керсә дә, инде күпме калфаклар, изүләр ясавы турында горурланып сойләде. Аның эшләре замана таләпләренә туры китереп ясалган.

Очрашуда «Ак калфак» татар хатын-кызларының бөтендөнья иҗтимагый оешмасы әгъзасы, Тукай районының «Ак калфак» оешмасы җитәкче Ләйсән Хәниф кызы Шамилова да үзенең кул эшләре белән таныштырды, бөтендөнья татар конгресы әгъзасы Якупова Резедә Равис кызы да чыгыш ясады.

Әлеге очрашуны Теләнче-Тамак авыл җирлеге башлыгы Рамил Наҗметдиновның хатын-кызларны бәйрәм белән котлавы, быелгы “Татар кызчыгы” Халыкара бәйгенең районыбыз финалисты, авылыбызның “Ак чәчәк” балалар бакчасында тәрбияләнүче Рания Закирова чыгышы, Азалия Давлетшинаның матур җырлавы, Таңсылу Шарифуллинаның испан кызы биюе, Лена Каленованы моңлы тавышы, “Моң” баянчылар ансамбленең дәртле көйләре бизәп торды.

Әлеге очрашуга нәтиҗә ясап, шуны әйтәсе килә: татарлардан рухи мирас белән бергә матди мәдәният өлкәсенә караган мирас та калган. Шундыйларның берсе — халыкның өс киеме. Өс киеменең бик борынгы төрләре, әлбәттә, безгә килеп җитмәгән. Ә инде җиткән кадәресе халкыбызның кабатланмас иҗади көчкә ия булуын күрсәтә. Гасырлар буена халык бу эшкә үзенең кул көчен генә түгел, бәлки матурлыкка омтылышын, хыялын, эстетик зәвыгын да салган.

Теләнче-Тамак мәдәният йорты сәнгать җитәкчесе Рамилә Сәгъдиева.