Хөрмәтле райондашлар, мөселман кардәшләр!

Төрле милләт һәм дин вәкилләре үзара дус-тату яшәгән Тукай районында Рамазан һәм Корбан гаетләре ел саен зурлап үткәрелә. Бу изге бәйрәмнәрне халык көтеп ала һәм тиешенчә бәйрәм итәргә тырыша.
Мәңгелек кыйммәтләрне буыннан-буынга тапшырырга тиешлегебезне искә төшерүче изге бәйрәмне тиешле югарылыкта үткәрик. Гает көннәрендә чалган корбан итләре, бүләкләребез белән тирә-ягыбызда яшәүче мохтаҗларны, ятимнәрне һәм ялгыз карт-карчыкларны сөендерик, изгелектә – савап.
Изге бәйрәм районыбызда яшәүче төрле дин вәкилләренең иҗтимагый бердәмлеген, үзара дус-тату яшәүләрен тагын да ныгытсын. Районыбыз мәчетләрендә үткәрелә торган гает намазларында катнашып, вәгазь-нәсыйхәтләр тыңлау рухларыбызны пакьләндерсен.
Хөрмәтле тукайлылар! Сезгә ихлас күңелдән иман байлыгы, саулык-сәламәтлек, изге эш-гамәлләр башкаруда уңышлар телим. Корбан гаете мөбарәк булсын!

Муниципаль район башлыгы – Совет рәисе Фаил Камаев.