Татарстан табиблары аортасы өзелгән мотоциклчыны коткарган
Юл һәлакәтеннән соң авыр хәлдә калган мотоциклчы Республика клиник хастаханәсенә китерелгән. Табиблар катлаулы операция ясап, пациентның гомерен саклап калган. Бу хакта Татарстан Сәламәтлек саклау министры Альмир Абашев социаль челтәрләрдә хәбәр итте.
Авария 27 июньдә булган. Мотоциклчы тизлекне арттырмыйча барган, әмма аның алдына кинәт җиңел машина борылган. Ир-ат тормозга басып өлгермәгән һәм автомобильгә килеп бәрелгән. Бәрелүдән соң ул өч юл полосасы аша очып чыгып, җитди җәрәхәтләр алган. Аның оча сөяге, бот, тез, кул сөякләре һәм муен умырткасы сынган. Соңрак табиблар аортасы зарарланганын да ачыклаган.
Ир-атны ашыгыч ярдәм белән Республика клиник хастаханәсенә китергәннәр. Ул шок хәлендә булган. Табиблар тиз арада тикшерүләр үткәреп, операция ясаган. Башта сөякләрне ныгытып, яраларны эшкәрткәннәр.
Тикшерү вакытында белгечләр аорта катламнары аерылуын ачыклаган. Бу бик куркыныч хәл булган, чөнки пациент теләсә кайсы вакытта күп күләмдә кан югалтырга мөмкин булган.
Операция өчен кирәкле эндопротез Мәскәүдә генә табылган һәм аны ашыгыч рәвештә Республика клиник хастаханәсенә китергәннәр. 28 июньдә табиблар аортага операция ясап, эндопротез урнаштырган. Дүрт сәгатьтән соң пациент аңына килгән һәм үзе сулый башлаган.
Соңрак аңа сөякләрне ныгыту буенча тагын бер операция ясалган. Хәзер ир-ат өйдә дәвалана. Берничә айдан соң сөякләре тулысынча төзәлгәч, металл конструкцияләр алынырга тиеш.
Фото: канал МАХ Альмира Абашева
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев