Сакланудан да яхшы чара юк

Балалар, без өлкәннәргә караганда, салкын тиюне авыррак кичерә, көйсезләнә. Әти-әниләр өчен дә бу зур борчу. Шуңа күрә, ничек кенә уйласаң да, профилактика иң дөрес, отышлы әйберләрнең берсе булып кала бирә. Профилактика иң элек шәхси гигиенадан башлана. Ягъни:

• урамга чыкканда ел фасылына туры килгәнчә киенергә;
• өйгә кайту белән кулларны юарга;
• кул-аякларның һәрвакыт җылыда булырга тиешлеген онытмаска кирәк.

Салкын тиюдән һәм тын юллары вирусларыннан саклану чаралары буларак С витамины күп булган җиләк-җимеш (лимон, апельсин, мүк җиләге, карлыган) ашарга була. Кулларны һәм аякларны махсус ванналар кертеп чыныктыру да файдалы. Бу су температурасын 37-19 градустан башлап, әкренләп 18-20 градуска кадәр төшерү юлы белән башкарыла. Тәнне чыныктырудан кала балаларга хуш килердәй тәмле чыныктыру да бар. Аны туңдырманы җылытып ашатудан башлыйлар. Вакыт үтү белән җылы туңдырмадан, аның салкынын, суыткычтан әле генә алынганына барып җиткәнче ашаталар. Туңдырмага аллергиясе булган балалар өчен аны йогуртка алыштырырга мөмкин.

Профилактиканың өченче - вакцинация төре дә бар. Вакцинацияне гриппка, пневмококка, гемофилия инфекциясенә, ягъни авыруны кузгатучыларга каршы үткәрәләр. Иң мөһиме - әлеге вакциналарны вакытында (әйтик, гриппка каршысын хәзерге вакытта) ясату.

Гаиләдә авыручылар булса, түбәндәге саклану чараларын күрергә кирәк:

• авызны, борынны каплап торучы битлек кию, аны ике сәгать саен алыштырып тору;
• үтәли җил ясамыйча гына бүлмәләрне ешрак җилләтү;
• сарымсак, ылыслы агач майлары ише фитоницидлар кулланып, бүлмә һавасын сәламәтләндерү.

Ә менә вируслардан саклаучы махсус препаратларны һәм даруларны табиб белән киңәшләшкәннән соң гына кулланырга була.

Шушы гади, әмма файдалы киңәшләрне истә тотып, тәҗрибәгездә куллансагыз, үзегез дә, балаларыгыз да сау-сәламәт булыр, аларга бернинди дә салкын тию янамас.