Казанда «Фәнни алга китеш» премиясе лауреатлары бүләкләнде

Бәшир Рәмиев исемендәге ИТ-паркта абруйлы «Фәнни алга китеш. Научный прорыв» премиясе лауреатларын бүләкләү тантанасы узды. Фәнни тикшеренүләр һәм казанышлары өчен җиңүчеләр тугыз номинация буенча бүләкләр алды.

Иң югары бүләк һәм «Иң яхшы галим» исеме Россиянең атказанган галиме, физика-математика фәннәре докторы, РАН академигы һәм Казан шәһәренең хөрмәтле гражданы Кев Салиховка бирелде. Аның Россия фәненә керткән күпьеллык өлеше хезмәттәшләре һәм республика җитәкчелеге тарафыннан югары бәяләнде.

Чарада чыгыш ясап, Татарстан Республикасы Рәисе Рөстәм Миңнеханов төбәктә фән үсешен алга таба да ныгытуның мөһимлеген ассызыклады. Ул республикада галимнәргә ярдәм күрсәтелүен, дәрәҗәле инженерлык мәктәпләре булдырылуын, фәнни-тикшеренү учреждениеләре хезмәткәрләре өчен торак программалары гамәлгә ашырылуын билгеләп үтте. Әлеге уңышлы тәҗрибә илебезнең башка төбәкләре өчен дә үрнәк була ала, диде ул.

Лауреатның үз чыгышы аеруча зур кызыксыну уятты. Академик Кев Салихов фәннең җәмгыятьтәге роле турында фикерләре белән уртаклашты һәм киләчәктә дөньякүләм проблемаларны чишүдә аның әһәмиятен билгеләде. Галим, өлкән яшьтә булуына карамастан (аңа 90 яшькә якын), фәнни эшчәнлеген дәвам итәргә һәм хезмәттәшләре белән алга таба да эшләргә ниятләвен әйтте.

Шулай ук тантанада «Фәндә цифрлаштыру», «Перспектива», «Галим-мәгърифәтче», «Иң яхшы галим», «Иң яхшы фәнни остаз», «Фән - балаларга», «Галим журналист», «Фәнгә тугрылык өчен» номинацияләре буенча җиңүчеләр билгеләнде, "Махсус номинация" дә иясен тапты.