Биклән тарихы – олпат хезмәтем
Биклән авылында яшәүче Рәзинә Сәетгәрәева бик тынгысыз затлардан. Шагыйрә дә, чәчмә әсәрләре дә шактый аның. Газетабызның да актив хәбәрчесе. Бүген ул ТР Журналистлар берлегендә тора, ТР Язучылар берлегенең шәрәфле әгъзасы. Шушы көннәрдә Рәзинә Габделбәр кызының зур тырышлык таләп иткән тагын бер күләмле хезмәте дөнья күрде – «Биклән авыл тарихы» китабы басылып чыкты. Каты тышлык белән эшләнгән 450 битлек әлеге китап Уфа һәм Мәскәү архивларыннан алынган тарихи документларга, авыл өлкәннәре язып калдырган язмаларга, басма матбугатта чыккан материалларга нигезләнеп төзелгән. Китапта сугыш чорындагы авыр тормыш, сугыш һәм тыл ветераннары язмышы, авылның билгеле кешеләре белән танышырга була. Китап сигез бүлектән тора. Мәгариф һәм мәдәнияткә аерым урын бирелгән. «Бүгенге Биклән» дигән бүлек тә бар. Анда авыл сулышы, аны яшәтүче кешеләр турында язылган. Китап авторның җырлары, шигырьләре белән тулыландырылган.
