Тукай районында өлкән яшьтәге ир-ат үз дачасында мунча кергәндә тереләй янып үлгән

Татарстанның Тукай районында өлкән яшьтәге ир-ат үз дачасында мунча кергәндә тереләй янып үлгән. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

«Турбина» бакчачылык җәмгыятендәге дача участогында урнашкан мунчада янгын кич чыккан. Ут белән көрәшүчеләргә янгын турында кичке сәгать унда хәбәр иткәннәр.

54 һәм 56нчы янгын-коткару часте хезмәткәрләре дачага ун минут эчендә килеп җитсә дә, мунчаның түбәсе инде җимерелеп төшкән, корылманың үзен ялкын телләре тулысынча ялмап алган була.

Ут белән көрәшүчеләр янгынны сүндергән вакытта чабыну бүлмәсендә 71 яшьлек дача хуҗасының мәетен табып алган.

Башлангыч мәгълүматлар буенча, янгын электр приборларын дөрес файдаланмау нәтиҗәсендә чыккан.