«Татмедиа»да «Шәһри Чаллы» һәм «Якты юл» газеталарына яңа баш мөхәррирләр билгеләнде

«Татмедиа» медиахолдингында «Шәһри Чаллы» һәм «Якты юл» газеталарының яңа җитәкчеләрен билгеләделәр.

«Татмедиа» АҖ генераль директоры Шамил Садыйков хәбәр иткәнчә, әлеге вазифаларны Резеда Йосыпова һәм Рөстәм Зәкиев башкарачак.

«Чаллы – милли-мәдәни традицияләргә бай шәһәр. Безнең төп бурыч – шәһәрдә татар телендә чыга торган популяр гаммәви мәгълүмат чараларын үстерү. Шунлыктан без Резеда Йосыпованы „Шәһри Чаллы“ газетасының баш мөхәррире итеп билгеләргә карар кылдык. Ул танылган журналист, аңа зур өметләр баглыйбыз», - диде Садыйков.

Резеда Йосыпова гаммәви мәгълүмат чараларында 1987 елдан бирле кайный. Ул «Авыл утлары», «Нур» газеталарында хәбәрче булып эшләде, «Чаллы-ТВ» радиостанциясендә җаваплы вазифа биләде. Соңгы елларда Йосыпова «Якты юл» газетасын җитәкләде.

Шамил Садыйков сүзләренчә, «Татмедиа» акционерлык җәмгыятендә Рөстәм Зәкиев җитәкчелегендәге «Якты юл» газетасына да укучылар тарафыннан кызыксыну артачагына өметләнәләр.