Татарстан районнары арасында халыкны эш белән тәэмин итүнең иң югары дәрәҗәсе Тукай районында булуы ачыкланган

Соңгы биш елда Татарстан районнары арасында халыкны эш белән тәэмин итүнең иң югары дәрәҗәсе Тукай районында булуы ачыкланган. Биредә яшәүчеләрнең яртысы диярлек эш белән мәшгуль. Бу хакта мәгълүмат Татарстан Икътисад министрлыгы сайтында урнаштырылган.

«Татарстанның Тукай районында яшәүчеләрнең яртысына якыны эшкә җәлеп ителгән. Соңгы биш елдагы мәгълүматны анализлаганнан соң, Татарстан Фәннәр академиясенең Перспективалы икътисади тикшеренүләр үзәге галимнәре шундый нәтиҗә ясады», - диелә министрлык сайтында.

Галимнәр Казан, Лаеш, Алабуга, Әлмәт һәм башка районнарда да халыкны эш белән тәэмин итү югары дәрәҗәдә булуын билгеләп үткән.

Алар төбәкнең байлыгы халыкның тормыш дәрәҗәсенә ничек тәэсир итүен өч критерий — үсеш, мәшгульлек һәм буыннар тигезлеге буенча бәяләгән.