Татарстан Президенты “Ак Барс” хоккейчыларына дәүләт бүләкләрен тапшырды

Татарстан Президенты Рөстәм Миңнеханов Континенталь хоккей лигасы яңа сезоны алдыннан традицион очрашуда “Ак Барс” хоккейчыларына дәүләт бүләкләрен тапшырды.

Президент кулыннан “Татарстан Республикасы алдындагы казанышлары өчен” орден медален узган плей-оффның иң кыйммәт уенчысы, Роб Клинкхаммер “алтын” голы авторы Джастин Азеведо, шулай ук Михаил Глухов, Никита Лямкин, Федор Малыхин, Алексей Потапов, Владимир Ткачев, Рафаэль Батыршин һәм “Ак Барс”ның экс-уенчысы Дмитрий Обухов алды.

Тагын команданың биш хоккейчысы “Фидакарь хезмәт өчен” медаленә лаек булды. Аны голкиперлар Артур Мисбахов һәм Александр Шарыченковка, сакчылар Роман Абросимов, Роман Манухов һәм Михаил Сидоровка тапшырдылар.

Континенталь хоккей лигасы яңа сезоны беренче матчын “Ак Барс” өйдә үткәрә – беренче сентябрьдә казанлылар “Татнефть-Арена”да Петербург СКАсы белән уйнаячак. Әлеге матч җиңүчесе 2018/2019 ел сезоны ачылышы Кубогы иясе булачак.