Суга батудан ничек сакланырга?

admin, 28 июль 2020 - 08:15

769

Бу көннәрдә республиканың төрле район-шәһәрләрендә, шулай ук Чаллыда суга батучылар турында хәвефле хәбәрләр килеп тора. Балаларның бату очраклары да күп. Берничә көн элек кенә районда судан берьюлы ике яшүсмернең – икетуганнарның гәүдәсен чыгардылар. Фаҗигадән ничек сакланырга, суга батучыны ничек коткарырга – гадәттән тыш хәлләр хезмәткәрләре тукайлыларга куркынычсызлык чараларын тагын бер мәртәбә искәртә, үз киңәшләрен бирә.

– Белмәгән урында суга кермәгез;
– Ялгызыгыз гына коенмагыз;
– Эчкән килеш суга кермәгез;
– Су коену тыелуын аңлаткан билгеләр бар икән – ул урыннан читкә китегез;
– Моторлы, җилкәнле суднолар, көймәләр, баржалар һәм башка транспорт чаралары йөзгән җиргә якын бармагыз – бу бик куркыныч;
– Иптәшләрегезне ярдан, вышкалардан, трамплиннан суга этеп төшермәгез;
– Туңганчы һәм арыганчы йөзмәгез;
– Балаларны су янында караусыз калдырмагыз.
– Йөзгәндә бик нык арыйсыз икән, тыныч калырга тырышыгыз, яр буена кадәр йөзеп чыгарга көчегез барлыгына ышаныгыз. Аркагызга әйләнеп ял итегез, сулышыгызны тигезләгез.
– Су агымына эләксәгез, шул агым буенча йөзегез һәм уңайрак урында яр буена таба борылырга тырышыгыз;
– Суга егылган очракта үпкәгезгә мөмкин кадәр күбрәк һава алырга тырышыгыз, вертикаль торышны алыгыз. Паникага бирелмәгез, үзегезнең көч белән йөзеп чыгарга омтылыгыз, тыныч калыгыз.
– Арыган кешене судан чыгарганда аның артыннан килеп, кулларын иңгә алырга кирәк. Батучыны коткарганда да бу кагыйдәне истән чыгарырга ярамый.