Шилнәбаш авылында бәйрәм кичәсен «Ветеран» клубында уздырдылар

Бәйрәм кичәсен Шилнәбаш авыл җирлеге башлыгы урынбасары Ольга Чекушкова ачып җибәрде. Ул барлык кунакларны Өлкәннәр көне белән котлады. Алга таба тамашачыларга музыкаль программа тәкъдим ителде. Залда утыручы әби һәм бабайлар Нурзилә Бариева, Гөлнар Ибраһимова һәм Ариана Прокопьева катнашында сәхнәләштерелгән әсәр карадылар. Кунаклар шулай ук «Оныгым өчен уенчыклар», «Күңелле мәшәкатьләр», «Мультпарад», «Тәмле ризыклар» кебек бәйгеләрдә көч сынаштылар. Бәйрәм кичәсендә барлык юбилярларны котладылар, бүләк итеп алар каршында Лиана Султанярова, Полина Панасенкова үзләренең җырлары белән чыгыш ясадылар. «Ладушки» балалар фольклор коллективы һәм «Тополёк» балалар бакчасына йөрүче сабыйлар җырладылар һәм шигырьләр сөйләделәр. Демид Петриванов исә үзенең әбисе турында шигырен укыды. Ә «Рябинушка» ансамбленең өч солистының чыгышы кунаклар өчен сюрприз булды. Алга таба сәхнәгә Константин Титов, Гөлнара Садыйкова менделәр, шулай ук аккордеон моңнарына кушылып Мария Маратаева үз җырларын бүләк итте. Әби-бабайлар бик рәхмәтле калды, дип яза китапханә мөдире Нурзилә Бариева.