Иҗтимагый Совет яңа составта җыелды

Узган атнада иҗтимагый Совет яңа составында үзенең беренче утырышын уздырды. Әлеге составка иҗтимагый оешма җитәкчеләре, шулай ук руханилар, район тормышының төрле өлкәләреннән вәкилләр керде. Тулы исемлек белән газета сайтында таныша аласыз.
Иҗтимагый Советның рәисен һәм сәркатибен сайлау буенча утырышта район ветераннар советы рәисе Галимҗан Зарипов чыгыш ясады. Шулай итеп, рәис вазифасына Файсал Гыйлаев, ә сәркатип итеп Гөлназ Шакирова билгеләнде. Совет составына кергән кешеләр эш төркемнәренә бүленеп, киләчәктә эшчәнлекне төп шушы юнәлешләрдә алып барачак. Иҗтимагый берләшмәләр буенча төркем, мәсәлән, райондагы барлык шушындый берләшмәләрне барлап, аларның эшчәнлегенә күзәтчелек итү, сораулар килеп чыкканда ярдәм итү белән шөгыльләнәчәк. Коммерцияле булмаган оешмалар белән эшләү төркеме, исеменнән үк күренгәнчә, әлеге оешмаларның эшчәнлеген тагын да җанландырып җибәрү, аларга төрле грантлар алу программаларында методик һәм практик яктан ярдәм итү белән мәшгуль булачак. Ә эшчәнлек сыйфатын бәйсез бәяләү төркеме райондагы төрле оешма, хезмәтләрнең эшчәнлеген тикшерәчәк, халык арасында сораштыру үткәреп, махсус әзерләнгән анкеталар ярдәмендә үз бәяләмәсен бирәчәк һәм алдагы эшчәнлеккә киңәшләрен, кайсы өлкәгә ныграк игътибар бирү кирәклеген әйтәчәк.
Агымдагы елда пассажирлар йөртү оешмасы һәм фельдшерлык-акушерлык пунктларының эшчәнлекләре бәяләнәчәк. Хәзерге вакытта иҗтимагый совет әгъзалары шушы юнәлештә эзлекле эш планын әзерләү белән мәшгуль. Киләсе утырышта, ә ул икенче атнага планлаштырылган, шушы мәсьәлә беренчеләрдән булып каралачак.