Интернетта Татар энциклопедиясе онлайн эшли башлады

Татарстан Фәннәр академиясенең Татар энциклопедиясе институты башкарган мультимедияле энциклопедия интернетта сынау режимында онлайн эшли башлады. Бу хакта Бөтендөнья татар конгрессы матбугат хезмәте хәбәр итә.

"Tatarica. Татар энциклопедиясе" исемле сайт 6 томлы "Татар энциклопедиясе"нә нигезләнгән.

Сайтта мәгълүмат татар һәм рус телендә бирелгән.

Әлеге проектның максаты — Татарстан һәм татарлар турында иң тулы фәнни мәгълүматны интернет челтәренә урнаштыру һәм татар китабы традицияләрен саклау, диелгән сайтта.