Икеме, әллә егерме икеме?

Әйтергә кирәк, редакция әлеге проблема белән күптәннән таныш. Узган елның сентябрь аенда шундый ук хат алган идек. Ул чакта мәсьәләгә ачыклык кертер өчен район капиталь төзелеш идарәсе белгечләренә сорау белән чыктык: «Калмаш авылының Зөфәр Галиев урамында урнашкан 22нче йортта кайчан капиталь ремонт көтелә?» Идарә белгечләре капиталь ремонт якын еллар планына кертелмәгән дип җавап бирде. Йорт программада тора-торуын, әмма анда чиратның кайчан җитәчәге билгеле түгел. Әлеге йортка хезмәт күрсәтүче «Тамерлан» идарә компаниясе җитәкчесе Татьяна Харисова проблеманы агымдагы ремонт – түбәне ямау белән башкарып чыгарга вәгъдә итте. Әмма моның файдасы тимәде, сорау бүген дә ачык. 
1984 елда төзелгән йортның тышкы кыяфәте үк кызганыч хәлдә. Подъезд стеналарындагы буяулар купкан, күгәргән, су эзләре бар. 
 Безне унберенче фатирның хуҗасы Дифинә Закирова каршы алды. 
– Быел аеруча җафа чиктек, җәй яңгырлы булды. Дымлылык аркасында түшәмнәр, стеналар, обойлар каралып бетте, күгәрек белән капланды. Хәтта ишекләр күбеп чыкты. Астагы катларда да шул ук проблема. Су агудан килгән зыянны исәпләп бетерерлек түгел. Идәннәргә чиләк тезелгән, – дип сөйләде Дифинә ханым.
Биредә яшәүчеләрнең сүзләренчә, бу йортта торак-коммуналь хезмәтләр өчен түләмәүчеләр юк, бар гаилә дә имин, тәртипле. «Лаекла ялда кешечә яшисебез килә», – диләр йортта яшәүчеләр.
Без идарә компаниясе җитәкчесе Татьяна Харисовага тагын мөрәҗәгать иттек.
– 2020 елның капиталь төзекләндерү программасына Зөфәр Галиев урамындагы 2нче һәм 22нче йортларның кайсысын кертү дигән сорау туды. Дөрес, 22нче йортта яшәүчеләрең торак-коммуналь хезмәтләр өчен әҗәтләре юк. 2нче йортта яшәүчеләрнең 300 меңнән артык бурычлары җыелган, тик балигъ булмаган балалар бик күп. Бу мәсьәләне хәл итү өчен якын арада Шәһәр торак инспекциясе вәкилләре катнашында комиссия оештырылачак, – дип җавап бирде ул.