Яз һәм Хезмәт бәйрәме белән!

Тынычлык, хезмәт, бер-береңә хөрмәт – тормышта мәңге үзгәрмәс кыйммәтләр, җәмгыятьнең үсеш нигезе.

Бүген без хезмәт кешеләрен котлыйбыз һәм хөрмәтлибез, хезмәт коллективларыбыз казанышларына сөенәбез, үзләренең фидакарь хезмәте белән районыбызны күтәргән барлык тукайлыларга рәхмәт сүзләрен җиткерәбез.

Тукайлылар эшкә булган халык, игелекле гамәлләргә омтылу сыйфаты – территориябез үсешенең төп нигезе. Үз хезмәтебез белән яшәешебезне, киләчәк буынның тормышын тагын да яхшырак итәчәгебезгә ышанам. Районыбыз игенчеләре бу көнне елның-елында басуда тырыш хезмәт белән каршылый. Бүген кырлар моторлар гөрелтесенә күмелгән. Яңа уңышка нигез салына – җиребезгә бәрәкәт иңсен, мул уңыш үстереп алырга язсын. Елыбыз хәере белән килсен. Җылы май кояшы сезгә көч-куәт өстәсен, күңелләрегез һәрвакыт бәйрәм кәефе, шатлык-сөенечләр, тормышка мәхәббәт хисе белән тулып торсын. Барчабызга да исәнлек-саулык, йортларыбызга бәрәкәт, гаиләләребезгә бәхет, илгә-көнгә иминлек телим.

Тукай муниципаль районы башлыгы Фаил Камаев.