Электр җиһазларының төзексезлеге сәбәпче

Беренче очрак – Мусабай Заводта. Биредә сип-панельдән төзелгән йортка ут каба. Комсомолец поселогыннан һәм шәһәрдән сүндерүчеләр килеп җиткәнче бинаның бер өлеше янып бетә. Мусабай Заводның үзендә янгын сүндерү машинасы бар-барын, ләкин кыш көне ул эшкә ярамый, чөнки аны сакларга җылы гараж юк. Ут чыкканда йортта беркем дә булмый, ул җәй көне генә файдаланыла торган була. Янгынның сәбәбе – электрүткәргечләрнең төзек булмавы. 
Мәләкәс авылында чыккан янгында иске, инде кеше яшәми торган торак тулысынча янып бетә. Хуҗалар көздән генә ул торактан алты метр ераклыкта гына урнашкан яңа өйгә күченгән булалар. Бәхеткә, яңа йортка зыян килми. Хуҗаның сөйләвенчә, кичке сәгать 6ларда өйдә ут сүнә. Ул иске өй эченең төтенгә күмелүен, электр щитыннан очкыннар чыгуын күреп ала. Хуҗа шунда ук 112 хезмәтенә шалтырата. Сүндерүчеләр бинаны коткарып кала алмыйлар. Монда да янгын чыгуга электр җиһазларының төзексезлеге сәбәп була, дип хәбәр итә күзәтчелек эшчәнлегенең район бүлеге баш белгече Илнар Мифтахов.

Фото Илнар Мифтаховтан алынды.