Чаллыда Коръән күргәзмәсе ачылды

Рамазан аеның беренче көнендә Чаллы шәһәре музееның күргәзмәләр залында Коръән күргәзмәсе ачылды

Күргәзмә Казан Кремленең "Кол Шәриф" музее Коръән коллекциясенең уникаль өлешен, күренекле шәмаил һәм тугра остасы, Г.Тукай бүләге лауреаты Нәҗип ага Нәккашның мәшһүр әсәрләрен, "Сабыр" ательесы теккән мөселман киемнәре үрнәкләрен, шәһәр "Хәләл-Үзәге" тәкъдим иткән дини сувенирлар һәм китапларны үз эченә ала. Шулай ук музей дирекциясе күргәзмә ачылу көненә шәһәр мәчетләре турында махсус стенд та әзерләде. Анда шәһәрнең 14 мәчете турында мәгълүматлар урнаштырылган.

Күргәзмәне ачу тантанасында шәһәр имамнары, сәнгать әһелләре, фән эшлеклеләре, мәгълүмат чаралары вәкилләре катнаштылар. Күргәзмәдәге Коръән коллекциясе белән Казан Кремле ислам мәдәнияте музееның өлкән фәнни хезмәткәре Миләүшә Илгиз кызы Даутова таныштырды. Ә Нәҗип ага Нәккаш үз әсәрләре эчтәлеге, аларның язылу тарихы турында сөйләде.

Күргәзмә Рамазан ае дәвамында, ягъни 15 июньгә кадәр эшләячәк.