Биредә урман булачак

– Бу акция Тукай районында мондый зур күләмдә беренче тапкыр үткәрелә. Волонтерлар да быел күп, үзләре теләп килделәр, хәтта чүп җыю өчен КамАЗ машинасы да бар, – дип билгеләп үтте Татарстан участок урманчылыгының участок урманчысы Ирек Сафин.
Чыршы үсентеләрен Алабуга питомнигы биргән, наратны исә Сабадан алып кайтканнар. Туфрак җиңел, комлы, чокыр казу авыр түгел.
– Кызганыч, утырткан агачлар янына үзебезнең исемнәрне язып куеп булмый. Берничә елдан соң килеп, менә бу агачны мин утырттым дип сокланып карар идем, – ди җиденче сыйныф укучысы Арина. Күренеп тора, ул бу эшкә бик җитди карый: ашыкмый, һәр үсентене җиренә җиткереп урнаштыра, җирне ныгытып тыгызлый. Барысын да нәкъ менә урманчылар өйрәткәнчә башкара.
Акциядә катнашучы волонтерларны исә өйрәтеп тору кирәк түгел – аларның тәҗрибәсе бай, үсентеләрне тиз һәм дөрес итеп утырта баралар. Кемдер гаиләсе, балалары белән килгән, кемдер дусларын иярткән. 
«Ел саен бердәм урман утырту көнендә катнашабыз һәм елдан-ел үз теләкләре белән катнашучылар саны арта бара. Без һәр үсентене күңел җылысын биреп утыртабыз, бәлки шуңа да аларның барысы диярлек – 90 проценты яңарып китә. Бу бик югары күрсәткеч», – дип сөйләделәр волонтерлар.
Нарат һәм чыршы үсентеләрен утырту тәмамлангач, урман эченнән чүп җыярга тотындылар. Оештыручыларның әйтүенчә, ул көнне барлыгы 10 кубометрга якын чүп-чар җыелган. 
– Бу акциядә катнашкан яшь буын вәкилләре табигать байлыгы урманны сакларга өйрәнерләр дип ышанам. Бу мәсьәләдә өлкәннәр дә үрнәк күрсәтергә тиеш, чөнки балалар күп нәрсәне әти-әнисенә карап кабатлый. Әгәр дә без табигать ресурсларына карата карашыбызны үзгәртмәсәк, сак булырга өйрәнмәсәк, киләчәк нинди булыр? Моның турында һәр кеше уйланырга тиеш, – ди Ирек Габделбәрович. Шулай ук ул республика территориясендә табигатьне янгыннардан саклау буенча махсус режим гамәлгә кертелгәнен, бу чорда таләпләрнең катгыйлыгын искәрте.