Авылда яшәүчеләр муен флегмонасы авыруларына ешрак бирешә

Авыл җирендә яшәүчеләр арасында муен флегмонасы авыруы ешрак очрый. Бу хакта бүген “Татар-информ”да узган матбугат конференциясендә билгеле булды.

Матбугат очрашуы 14-23 гыйнвар аралыгында республикада узган “Лор органнары авырулары профилактикасы” декадасы нәтиҗәләренә багышланды.

“Муен флегмонасы авыруы тиз арада баш калкыта. Ул 7-12 көн эчендә күзәтелергә мөмкин. Авыруның төп сәбәпчесе – тонзиллит”, - диде Республика клиник хастаханәсенең отоларингология бүлеге башлыгы Марат Гыйләлев.

• Муен флегмонасы – тире астындагы май күзәнәге авыруы. Авыру вакытында муенның йомшак тукымасын патоген бактерияләр зарарлый. Нәтиҗәдә, муенга үлек җыела. Вакытында дәваланмаган очракта кеше үләргә мөмкин.

“Әлеге авыруга авыл җирендә яшәүчеләр ешрак бирешә. Кариесны вакытында дәваламау, тешләрне вакытында алдырмау кебек стоматология авырулары да үлеккә әйләнеп, муен авыруларына китерә”, - диде табиб.