Актаныш башлыгы Энгель Фәттахов мәктәп балалары агулану турында аңлатма бирде

Актаныш районы башлыгы Энгель Фәттахов мәктәп укучылары агуланып хастаханәгә китерелү турында "Татар-информ"га аңлатма бирде. 

• Бүген Актаныш үзәк хастаханәсенә Актаныштагы 2 нче номерлы гомуми урта белем бирү  мәктәбендә укыган 19 баланы китергәннәр. Алар ризык ашап агуланган дип фаразлана.

"Бу факт буенча районның гадәттән тыш хәлләр комиссиясенең утырышы узды. Хәзер балалар кирәкле медицина ярдәмен ала. Башлангыч диагноз - гастроэнтеритның кискен формасы. Прокуратура районга килгән Роспотребнадзор белгечләре белән бергә тикшерү алып бара. Тикшерү нәтиҗәләре буенча балалар сәламәтлегенә куркыныч тудырган кешеләргә карата катгый чаралар күреләчәк. Моннан тыш, барлык белем бирү учреждениеләре дә тикшереләчәк. Көн азагына күпчелек балалар хастаханәдән чыгар дип көтәбез. Кирәкле медицина ярдәмен күрсәтү шәхсән минем контрольдә", - диелә район башлыгы Энгель Фәттахов аңлатмасында.