19 май – Татарстан Матбугаты көне

Районыбыз кебек үк, быел газетабызның да юбилей елы – аның нәшер ителә башлавына август аенда 45 ел тула. Ә бу еллар артында күпме газета томнары, аларда – район тормышы, авыллар, кешеләр язмышы. Илдә реформалар, сәясәттә үзгәрешләр барганда, тормышыбызда күп төшенчәләр яңа юнәлеш алганда «Якты юл» һәрвакыт урталыкны сайлый белде, кыйбласын югалтмады, туган җиргә, авыл мәнфәгатенә тугры чын авыл газетасы булып калды. Быел районда тагын бер мәгълүмат чарасы барлыкка килде – «Күңел» радиосында «Тукай авазы» тапшыруы эшли башлады. Радио эшен алып баруда да район газетасы хезмәткәрләренең ярдәме зур. 
Хөрмәтле журналистлар! Сез үтә дә җаваплы эш башкарасыз. Халыкны мәгълүматлы итү, һәр яңалыкның асылына төшендерү сездән киңкырлы белем, тормыш тәҗрибәсе, яңа техник мөмкинлекләрдән нәтиҗәле файдалануны таләп итә. Елдан-ел камиллеккә омтыласыз, хәзер басма матбугат белән беррәттән Интернет битләрендә, социаль челтәрләрдә актив эш алып барасыз. Районда яшәүчеләр һәрвакыт сезнең белән тыгыз элемтәдә.
Районыбыз эшчәнлеген оператив яктыртуда, җитәкчелек һәм халык арасында ышанычлы элемтә булдыруда куйган хезмәтегез өчен олы рәхмәтемне белдерәм. Һөнәри бәйрәмегез белән ихлас күңелдән котлап, барыгызга да ныклы сәламәтлек, гаилә бәхете, имин көннәр, тыныч тормыш һәм яңа иҗади уңышлар телим. Сүзегез үткен-үтемле, уйландырырлык, хәбәрчеләрегез актив, укучыларыгыз күп булсын.

Район башлыгы Фаил Камаев.