Спартакиада үтә

Спартакиадага 23 авыл җирлеге, «Чаллы-Бройлер», «Тукайтеплогаз», «Кама-Бекон» җәмгыятьләре, «Кама» агрофирмасы, «Ярыш», «Гигант» хуҗалыклары, күзәтчелек эшчәнлеге бүлеге, район үзәк дәваханәсе hәм хакимият хезмәткәрләре киләчәк.
Командалар спортның 9 төре буенча – шахмат, чаңгыда узышу, өстәл теннисы, йөзү, волейбол, армрестлинг, дартс, бадминтон, канат тарту ярышларында көчләрен сынаячак.
– Спартакиада мондый киң масштабта районда беренче тапкыр үткәрелә. Максатыбыз – спорт hәм сәламәт яшәү рәвешен пропагандалау, райондашларны физкультура һәм спорт белән шөгыльләнүгә җәлеп итү hәм яшьләрнең спорт осталыгын күтәрү, – ди спартакиаданы оештыручы, район яшьләр эшләре, спорт hәм туризм бүлеге башлыгы Илнур Гәрәев.
Ярышлар, берничә урынга бүленеп, Яңа поселогы мәктәбе спорт залында, балалар һәм яшүсмерләр спорт мәктәбендә hәм чаңгы трассасында, Круглое Поле поселогының «Акчарлак» бассейнында, Сосновый Бор поселогының универсаль спорт залында үтәчәк.
– Ярышларга 18 яшьлек hәм аннан өлкәнрәк катнашучылар гына кертелә. Бер спортчы ике спорт төрендә катнаша ала, – ди Илнур Рәкыйпович. 
Спартакиадада спортның аерым төрләре буенча шәхси беренчелек һәм командалар арасында урыннар билгеләнәчәк.
Җиңү яулаган командалар дипломнар, медальләр һәм спорт инвентарьлары белән бүләкләнәчәк. Беренче урынга йөгерү юлы тренажеры, икенчегә – көч тренажеры, өченче урынга велотренажер биреләчәк.