Район медицина хезмәткәрләре республика спартакиадасында җиңү яулады

Спартакиадада район данын үзәк дәваханәнең баш табибы җитәкчелегендә табиблар, фельдшерлар, шәфкать туташлары яклады. Алар барысы бергә 32 кеше булды. 
– Һәр ел саен зона бәйгесендә актив катнашабыз. Ярышның беренче этабы дәвалау оешмалары арасында үтте. Икенче этабында биш район белән ярыштык. Шушы этапта җиңеп, республикакүләм ярышка чыктык, – дип сөйли район үзәк дәваханәсе баш табибы Галим Сабирҗанов.
Ярышлар спортның 6 төре буенча узган. Программага волейбол, шахмат, өстәл теннисы, канат тарту, җиңел атлетика эстафетасы кергән.
Волейбол буенча районның хатын-кызлар командасы беренче урын алса, ир-егетләребез өченче урынга лаек булган. Бадминтон уенында исә безнең гүзәл затлар икенче, ир-атлар өченче урын яулаган. Тагын бер спорт төрендә – шахматта тукайлылар беренче урынга лаек булган. 
– Ярышта ГТО нормаларын да тапшырдык. Үзенә күрә күңелле чара инде, – ди спартакиадада катнашкан Миләүшә Фәрдиева.
Спартакиадада катнашучыларны яраткан һөнәр генә түгел, ә спортка мәхәббәт тә берләштергән. 
– Без яхшы нәтиҗәгә бергәләп ирештек. Гомуми исәп буенча җыелма команданың 3нче урын алуы юкка түгел, – дип сөйли баш табиб Галим Габбасович.
Бүләк акчага үзәк дәваханә спорт кирәк-яраклары алырга планлаштыра. Шулай ук спартакиадада катнашучыларга район үзәк дәваханәсе тарафыннан да акчалата премия вәгъдә итәләр. 

Марат Хафизов фотосы.