Чаңгы сезоны ачыла

Теләге булган hәр тукайлы өчен кышкы спорт төре белән шөгыльләнергә зур мөмкинлек ачыла. 
Районның яшьләр, спорт hәм туризм җитәкчесе Илнур Гәрәев сүзләренчә, моңнарчы районның чаңгы юлы Тләнче Тамакта урнашкан булган. Быел ул Новый поселогы урманына күчерелгән.
– Чаңгы трассасы сезонга әзерләнде. Агачлар киселеп, юл киңәйтелде. Шулай ук аны тигезләү буенча юлчылар зур эш башкарды, – дип сөйләде ул.
Трассаның озынлыгы 3 км тәшкил итә. Кыш дәвамында аны махсус хезмәтләр күзәтеп торачак. Авышлык булган урынарда төшерү һәм күтәрелеш ясалган. Киләчәктә участок яктыртылачак. Шулай ук республика программасы буенча чаңгы базасы төзеләчәк. Биредә прокат пункты да ачылыр дип көтелә.
– Чаңгычыларны теркәү Новый поселогы мәктәбендә – сәгать 8дә, тантаналы өлеше 10да башлана. Катнашучылар өчен кайнар чәй hәм камыр ризыклары, чаңгылары булмаганнар өчен прокат оештырылачак.Райондашларыбызны чаңгы юлларында көтеп калабыз, – ди Илнур Ракыйп улы.

Илнур Гәрәев фотосы.