Имтихан биреп карыйлар

«Имтихан биреп карау яңалык түгел, – дип сөйләде мәгариф идарәсе башлыгы урынбасары Сания Дәүләтшина. – Ул елга ике мәртәбә оештырыла. Беренчесе ноябрь-декабрь айларында үтте. Икенче мәртәбә имтихан биреп карау февраль азагына-март башына туры килә. Быел да март ае башыннан укучылар имтихан бирү пунктларында тест биремнәрен үтиләр. Тугызынчы сыйныфлар Круглое Поле мәктәбендә рус теле белән математикадан, чын төп дәүләт имтиханнарын тапшырган кебек сынау биреп карый. Ә унберенче сыйныфлар Яңа поселогы мәктәбендәге базада бөтен шартларына туры китереп имтихан бирә». 
Укучыларның белемен тикшереп карау дәүләт чыгарылыш аттестациясенә әзерлек кысаларында, «Белем бирү сыйфатын ачыклау региональ үзәге» белән килешү нигезендә уздырыла. Әти-әниләр һәр тест өчен 350 сум акча түли. Тикшерү тестлары үтү мәҗбүри түгел, әмма балаларның белем дәрәҗәсен билгеләү өчен катнашучыларның күбрәк булуы әйбәтрәк. Ә эшләр, чын имтихан вакытындагыча, Казанда тикшерелә. 
Имтихан биреп карау чыгарылыш сыйныф укучыларының белем дәрәҗәсен билгеләү һәм аларны имтиханнарга әзерләү максаты белән оештырыла. Быел район мәктәпләренең тугызынчы сыйныфын – 304, унберенчене 94 укучы тәмамлый.