Суд приставлары районга кайта

1 июльдән Менделеевск һәм Тукай районнары буенча суд приставлары хезмәте ике мөстәкыйль бүлеккә бүленде.
Хәзер суд приставлары бурычлыларга карата эшләрне аларның яшәү урыны буенча кузгаталар. Халыкны кабул итү исә вакытлыча Менделевск шәһәрендә Пионерская урамы, 9нчы йорт адресы буенча башкарыла. 

Реорганизация беренче чиратта халыкка уңайлыклар тудыру максатыннан эшләнә. Үзгәрешләр шулай ук суд приставлары эшен нәтиҗәлерәк итү өчен кертелә. 
Бүлекчәләрнең эш графигы да үзгәрде. Гражданнарны һәр сишәмбе 9.00-13.00 сәгатьләрдә һәм һәр пәнҗешәмбе 13.00-18.00 сәгатьләрдә кабул итәләр. Эш көннәрендә һәр көнне гражданнар дежур приставка мөрәҗәгать итә алалар. Аңа тиз арада хәл итәргә кирәк булган мәсьәләләр – акчалардан арестны алу, керемнәрдән тотыла торган акчаның күләмен киметү, милектән чикләүне алу, алимент буенча бурычларны исәпләтү кебек сораулар белән мөрәҗәгать итәргә була.