Кайчан туктатырга?
Урам капкасы кинәт шапылдап ачылды, кемнеңдер ахылдаганы-уфылдаганы, ыңгырашканы ишетелде. Бакчада помидор сабаклары бәйләп йөргән Рәхилә, керүчедән дә битәр авыр сулап, ишегалдына атылды. “Тагын берәр җире бәрелгәндер, сынгандыр, тайгандыр!” Хатынның уйлары төпчеге – әле агач башыннан тәгәрәп төшәргә, әле койма башыннан мәтәлергә, әле абзар түбәсеннән егылырга җай гына эзләп йөргән шук малае турында иде.
