Ул сугыш турында сөйләми иде

Бөек Ватан сугышы 1945 елның 9 маенда 0 сәгать 43 минутта тәмамлана. 
Җиңү хөрмәтенә СССР Югары советы президиумы «Берлинны алган өчен» медален булдыра. Әлеге бүләк 1 млн 82 мең кешегә бирелә. Бүләкләнүчеләр арасында минем карт бабаем Дмитрий Куприянович Малов та (1906-1973 елларда яшәгән) була. Ул фронтка сугыш башланганның беренче көннәрендә үк чыгып киткән. Өч тапкыр яраланган. Берлинны алганнан соң туган җиренә – Мамадыш районының Чаксы авылына кайткан. Пенсия яшенә җиткәнче тракторчы булып эшләгән. Туганнарыбыз әйтүенчә, карт бабаем сугыш турында сөйләргә яратмаган, бары: «Без күргәнне сезгә күрергә язмасын», – дип авыр сулый торган гына булган. 
Мин үземнең карт бабаем белән горурланам һәм ел саен «Үлемсез полк» акциясендә катнашам. Бабайларыбызның һәм карт бабайларыбызның батырлыгын онытмасак, алар үзләре дә йөрәкләребездә сакланыр. 

Дмитрий Малов. / Фото Денис Ивановтан алынды.