Моң иясе – подполковник

Кичәгә аның туганнары, якташлары, хезмәттәшләре һәм дуслары килгән иде. Шулай ук аның иҗатын яратучы, үзен хөрмәт итүче бикләнлеләр җыелды.
Иң беренче булып юбилярны котларга сәхнәгә Биклән авыл җирлеге башлыгы Мансур Сәхбиев һәм ветераннар советы рәисе Асия Фазуллина күтәрелделәр. Матур теләкләрен җиткергәннән соң, алар юбилярга истәлекле бүләкләр тапшырдылар. Мансур Шакирҗан улы Рим әфәндегә: «Сез иҗатта подполковник кына түгел, ә генерал», – диде.
Аннан соң Рим әфәнде үзенең шигырьләрен укыды һәм җырларын башкарды. Юбилярны котларга сәхнәгә бер-бер артлы туганнары, якташлары, хезмәттәшләре, дуслары менеп кенә тордылар, матур теләкләргә, чәчәк бәйләмнәренә һәм бүләкләргә күмделәр. Барысы да аның кешелекле, ярдәмчел, яхшы гаилә башлыгы булуын билгеләп үттеләр, аңа карата олы хөрмәтләрен белдерделәр..
Котлаулар концерт номерлары белән үрелеп барды. Чаллыдан Рим әфәнденең иҗатташ дуслары – җырчылар Айгөл һәм Ришат Шәйхетдиновлар килде. Билгеле инде, авылыбызның «Хәтфә» фольклор ансамбле дә читтә калмады. Ә инде өлкән яшьтәге гармунчыларыбыз Илдус Абдуллинның һәм Рәшит Тимергалинның халкыбыз көйләрен өздереп уйнаулары ямь өстенә ямь өстәде. Яшьләрчә җиңел гәүдәле Рәшит абыйның биюе тамашачыларны дәртләндереп җибәрде.
Сәхнәгә Моң алиһәсе белән Кирлемән образлары да чыктылар. Бабасы дәртле җырлар башкарганда кечкенә оныкчыгы Алия бик матур итеп әйләнә-әйләнә биеп торды. Юбилярыбыз җырлаганда Мәрьям апа һәм Рәдиф абый матур итеп вальс әйләнделәр.
Бәйрәм ахырында Рим әфәнде үзен хөрмәт итеп килгән Биклән халкына, кунакларга рәхмәтләрен җиткерде.
Рим Хәлиулла улының алга таба да иҗаттан аерылмавын, тагын да илһамланып, матур-матур шигырьләре һәм җырлары белән безне шатландырып торуын телибез. 

Римма ГЫЙМАДИЕВА.
Биклән авылы.
Фото автордан алынды.