Урак тәмамлана, чөгендер җыю дәвам итә, бәрәңге һәм кәбестә ала башладык

«Кама» агрофирмасы кырларында чөгендер җыю дәвам итә. Бүгенге көндә планның 921 гектары алынган. Тулаем җыем – 37 мең тонна. Гектарыннан уртача 402 центнер уңыш чыга. Әлеге күрсәткеч республика буенча беренче өчлеккә керә. 
«Р-Агро» хуҗалыгы кәбестә ала башлады. Бүгенгә 8 гектар мәйданнан 175 тонна кәбестә җыелган. Массакүләм җыю эшләренә хуҗалык хезмәтчәннәре 15 сентябрьдән керешергә планлаштыралар.
Шушы көннәрдә «Биклән» җитештерү кооперативы һәм «Ярыш» хуҗалыгы хезмәтчәннәре силоска кукуруз алуга керештеләр. Бүгенге көндә 115 гектар алынган, 1163 тонна силос салынган.
«Миңнеханов» һәм «Әшрәфуллин» крестьян-фермер хуҗалыклары «икенче икмәк»не җыя башладылар. Казылган 25 гектар җирдән 700 тонна бәрәңге чыкты. Уңдырышлык – гектарыннан 280 центнер.
Шулай ук, икенче ел уңышына нигез салуны кайгыртып, орлык материалын эшкәртү, сортлау һәм калибрлау эше бара. Районга 13,5 мең тоннадан артык орлык әзерләргә кирәк, шул исәптән 4345 тонна көзге бодай. 
Урак белән беррәттән җирне кышка әзерләү эшләре тукталып тормый. Бүгенге көндә 31 мең гектар җир туңга сөрелгән. Бу урып-җыелган мәйданнарның 77 процентын тәшкил итә. Бер тәүлек эчендә 1 мең гектар җир эшкәртелә, әлеге эшләргә 65 техника берәмлеге җәлеп ителгән. Әйтергә кирәк, туңга сөрү җир уңдырышлыгын һәм уңыш күләмен арттыра. Эш темпы буенча артта калучы хуҗалыклар – «Камский» җитештерү кооперативы, «Тимерхан» агрофирмасы, «Вилданов» крестьян-фермер хуҗалыгы, «Тукай азык-төлек корпорациясе». Әлеге хуҗалыкларга язгы сөрүгә калмас өчен тәүлеклек җитештерүчәнлекне арттырырга киңәш ителә. 
Көзге культураларны чәчү исә 111 процентка үтәлгән, бу – 12500 гектар җир. Быел көзге чәчүлек мәйданнары 10 процентка артты.