Гаилә ипотекасы лимитларын арттырырга мөмкиннәр

Россиядә гаилә ипотекасы программасында үзгәрешләр булырга мөмкин. Аларның берсе – кредитның максималь күләмен арттыру. Бу хакта ТАСС агентлыгына Дәүләт Думасының төзелеш һәм торак-коммуналь хуҗалык комитеты беренче рәисе урынбасары Владимир Кошелев белдерде.

Аның сүзләренчә, программадагы төп яңалыкларның берсе кредит лимитларын күтәрү булырга мөмкин. Бу гаиләләргә үз ихтыяҗларына туры килгән, иркенрәк фатирлар сатып алу мөмкинлеге бирәчәк.

Депутат билгеләп үткәнчә, бүгенге лимитлар – Мәскәү, Мәскәү өлкәсе, Санкт-Петербург һәм Ленинград өлкәсе өчен 12 млн сум, ә башка төбәкләр өчен 6 млн сум – күп очракта торак базарындагы бәяләргә туры килми.

Кошелев сүзләренчә, үзгәрешләрне әзерләгәндә берничә вариант каралган. Аларның берсе буенча, башкала төбәкләрендә лимитны 16 млн сумга кадәр, ә башка регионнарда 8 млн сумга кадәр күтәрү тәкъдим ителә. Икенче вариантта исә 60 квадрат метрдан зуррак фатир сатып алганда кредит күләмен 1,5 тапкырга арттыру күздә тотыла.

Депутат фикеренчә, лимитларны арттыру – квадрат метр бәяләренең үсүенә табигый җавап булып тора. Бу адым гаиләләргә иркенрәк фатирларны сайлау мөмкинлеге бирәчәк.

Аның фикеренчә, мондый үзгәрешләр гаилә ипотекасын балаларлы гаиләләр өчен торак шартларын яхшыртуда нәтиҗәлерәк инструментка әйләндерәчәк.