Мәктәпләрдә тәүге кыңгырау чыңы

1 сентябрь көнне Тукай районы мәктәпләре 4531 балага янә үз ишекләрен ачып җибәрде. Аларның 530ы – беренче сыйныф укучылары.

Круглое Поле поселогында яшәүче Ясминә Андреева да бүген әнисе Ләйсән, әтисе Радик, дүртенче сыйныфка күчкән абыйсы Айнур белән бәйрәм линейкасына юл алды. Бу аның тәүге тапкыр мәктәп бусагасыннан үтүе. Белем көне линейкасы алдыннан без өйләренә барып, алар белән сөйләшеп алдык.

– Мин мәктәпкә бару көнен түземсезләнеп көттем. Укудан курыкмыйм. Чөнки минем сыйныфымда бергә балалар бакчасына йөргән дусларым бар. Иң якыннары: Элина, Айзилә, Эмилия. Без бергә санарга да, укырга да өйрәндек. Үземнең укытучымның кем булачагын да беләм. Ул Зөлфия Хәйдарова, миңа бик ошады. Мәктәпкә әзерлек дәресләрендә безне күп әйберләргә өйрәтте, – дип уртаклашты кичерешләре белән Ясминә.

Шунысын да әйтеп үтәргә кирәк Ясминәнең нәкъ белем көне алдыннан гына туган көне булып узды. Аңа җиде яшь тулды.

– Мәктәпкә җәй башыннан ук әзерләнергә керештек. Безнең өчен бу беренче тапкыр гына түгел. Тәҗрибәбез бар. Кызыбызга мәктәп мохитенә күнегүе җиңел, күңелле узсын дип, әзерлек дәресләренә йөреттек. Ул анда булачак сыйныфташлары белән дә, сыныф җитәкчесе белән дә аралаша алды. Беренче дәрестән үк укытучысын Зөлфия Ревонеровнаны бик нык яратты. Әти-әниләр өчен баланың мөгаллим белән уртак тел табуы бик мөһим инде ул. Моңа бик сөендек, – дип сөйләде, Ләйсән Әсхәт кызы, Ясминәнең чәчәләрен тарап, ак бантиклар таккан мәлдә.

Аннары, беренче сыйныф укучысы Ясминә аркасына матур букчасын асып, кулына чәчәк бәйләме тотып, гаиләсе белән бергә мәктәпкә юл алды. Без аны да, районыбызның бар укучыларын, әти-әниләрне, мөгаллимнәрне шушы онытылмаслык күркәм бәйрәм – Белем көне белән ихластан котлыйбыз. Хәерле сәгатьтә!