Сабыйларга бәйрәм бүләк иттеләр

Җәйге чорда "Аленушка" балалар бакчасында сәламәтлек бәйрәме үткәрү матур гадәткә әйләнеп китте. Ә балалар өчен әлеге көн үтә дә кызыклы һәм мавыктыргыч булсын өчен, без аны әкияти формада үткәрергә булдык. Һәр әкият-маҗарадагы яхшылык белән яманлык үзара көрәшкән кебек үк, безнең бәйрәмебездә дә шайтан-пәриләр балаларны куркытып, аларга төрле киртәләр ясап тордылар. Шуңа да бу кара көчләрне сихерләргә туры килде: диңгез патшасы килеп, аларны азат итте. Бәйрәмебез төрле кызыклы уен-бәйгеләр белән үрелеп барды. Су тутырылган чиләкләр белән йөгерү, судан туп тотып алу, туп белән йөгерү дисеңме һ.б. Балалар бәйрәмдә үзләренең көч-осталыкларын күрсәттеләр. Тәрбиячеләр дә алардан калышмадылар. Ф. Меновщикова, М. Вәлиева, В. Громова, бәйрәмне оештырган спорт инструкторы Е. Газимова һәм аның ярдәмчеләре Т. Калашникова, А. Хисмәтова балалар белән рәхәтләнеп уйнадылар.

Ә бәйрәмнең кульминациясе - су коену булды. Хәтта иң кечкенәләр дә бәйрәмдә бик теләп катнаштылар, диңгез геройлары аларны су тамчылары белән "бүләкләделәр". Бәйрәм бик мавыктыргыч һәм истә калырлык булды. Балаларга ул бик тә ошады.

Җәйге чорда мәктәпкәчә яшьтәге сабыйларның саф һавада йөрүләре аларның организмнарын чыныктыра, һәрьяклы үсешкә уңай тәэсир итә. Шуңа да зурларның төп бурычы булып үсә торган бала организмының дөрес итеп оештырылган хәрәкәт һәм ялга булган ихтыяҗларын тулысынча канәгатьләндерү тора.