Ярамаган урыннан чыкканда машина бәргән

admin, 20 сентябрь 2019 - 14:00

1186

18 сентябрьдә кичке сәгать 6 тулгач район ЮХИДИ бүлегенә Яр Чаллының Старосармановская урамында җәяүлене бәрдерү турында хәбәр килә. Форд Фокус автомобилендә баручы 62 яшьлек ир-ат юл аркылы чыгучы җәяүлене күрми. Тукай районында яшәүче 63 яшьлек җәяүле ир-ат, бердән, ярамаган урыннан юл аша чыккан, икенчедән, киемендә бернинди яктылык кайтаргыч элементлар да булмаган. Һәлакәттә җәяүле баш җәрәхәтләре ала. Аны медицина хезмәткәрләре БСМПга алып китәләр.

ЮХИДИ хезмәткәрләре караңгыда йөргәндә киемегездә яктылык кайтаргыч элементлар булсын, җәяүле кичүеннән генә чыгыгыз дип һәрдаим кисәтеп торсалар да, җәяүлеләр үз гомерләренә һәм сәламәтлекләренә битараф кала бирә. Һәм нәтиҗә, күргәнебезчә, аяныч. Мондый фаҗигаләр һәрдаим кабатлана тора, дип кисәтә район ЮХИДИ бүлеге башлыгы Шамил Ганиев.