Урманнарда тәртипме? 

Фаил Мисбахович Яңа поселогы белән Калмаш җирлеге арасындагы урманлыкта булды. Урман хуҗалыгы хезмәте тарафыннан янгынга каршы чаралар күрелгән: урман читләре буразналар ясап сөрелгән, чүп-чардан саклау буенча урман алларына плакатлар язып эленгән. Аунап яткан пластик савыт-саба, чүп-чар күренмәсә дә, аланнарда ял итүчеләр калдырган «эз»ләр очраштыра. 
Рейдта катнашучылар урман буенда ял итүчеләргә дә юлыкты бу көнне. Район башлыгы табигать хозурына машиналарда чыгып, палаткалар корып ял итүчеләр белән әңгәмә корды. Чит төбәкләрдән килүчеләргә (машина номерларына караганда) безнең республикада һәм район территориясендә тиешсез вакытта урманга чыгарга ярамаганлыгы искәртелде. 
Алабуга урманчылы-гының район участогы урманчысы Ирек Сафин әйтүенчә, урманнардагы янгынның 90 проценттан артыгы кеше гаебе белән чыга. Ул тукайлыларны, авылларга кунакка кайтучыларны урманнарда аеруча сак булырга, куркынычсызлык кагыйдәләрен үтәргә чакыра. «Таләпләрне үтәмәгән, тиешсез вакытта урманга чыккан кешеләргә штраф салу каралган: физик затларга – 4 меңнән 5 мең сумга кадәр, вазифадагы затларга – 20 меңнән 40 мең сумга кадәр, юридик затларга 500 мең сумга кадәр. Кемнең дә булса гаебе белән урманда янгын чыкса, гаепле кеше РФ Җинаятьләр Кодексының 261 маддәсе буенча җинаять җаваплылыгына тартыла. Янгын чыгаруда гаепле зат матди зыянны да капларга тиеш була», – ди Ирек Сафин.