«Шәфкать»тә Иске Яңа ел бәйрәме

«Шәфкать» халыкка социаль ярдәм күрсәтү үзәге һәр истәлекле дата уңаеннан нинди дә булса чара оештыра. Иске Яңа ел бәйрәмен, ягъни Василий көнен дә үзенчәлекле итеп билгеләп үттек. Төрле гаиләләрдән җыелган 25 бала әлеге датаның ничек килеп чыгу тарихын бик бирелеп тыңладылар, бәйрәмдә үзләре дә актив катнаштылар. Чарага кунак булып Иске Яңа ел, төрле костюмнарга киенгән юраучылар һәм Яңа ел үзе килгән иде. Иске ел киләсе Яңа ел турында сөйләде, юраучылар бу көннәрдә нинди йолалар үткәрелүе хакында әйтте, Яңа ел исә конкурслар үткәрде. Чара ахырында без, Иске Яңа ел йоласын саклап, тозлы камырдан фигуралар ясадык, дип хәбәр итәләр үзәктән.