Район башлыгы рәхмәт белдерде

Бөек Җиңүнең 70 еллыгына багышланган чаралар, тантаналар гөрләп үтте. Хатирәләр яңарды. Сугыш ветераннары, яу кырында ятып калган авылдашлар, тыл ветераннары өр-яңадан барланды. Альбомнар эшләнде, стендлар ясалды һәм, әлбәттә, һәр авылда сугыш каһарманнарына куелган һәйкәлләр яңартылды, яңа исемнәр өстәлде. Кыскасы, ел буена район күләмендә Бөек Җиңүнең юбилее уңаеннан истә калырлык чаралар күп үткәрелде. 8-9 майда район авылларында митинглар, тантаналы кичәләр үткәрелде, концертлар куелды, һәм аларның эчтәлеге халыкның бөек батырлыгына багышланды. Шул уңайдан район хакимияте башлыгы Васил Хаҗиев район депутатларына, авыл җирлекләре башлыкларына, авыл хуҗалыгы берләшмәләре җитәкчеләренә, мәдәният хезмәткәрләренә, бәйрәмгә матди ярдәм күрсәткән эшмәкәрләргә рәхмәтен җиткерде. Районда Бөек Җиңүнең 70 еллыгы тиешле югарылыкта үтте.