Район башлыгы авыл имамнары белән зиратларны тәртипкә китерү турында сөйләште

Утырышны Васил Хаҗиев ачты. Үз чыгышында ул, имамнарга мөрәҗәгать итеп, авыл зиратларын чистарту, төзекләндерү, тәртипкә китерү кирәклеген искәртте. Имам-хатыйб Җәүдәт хәзрәт мәңгелеккә күчкән якыннарыбызның һәм туганнарыбызның истәлеге алдында бурычлы булуыбызны онытмаска, бу хакыйкатьне авылдашларның да аңына сеңдерергә кирәклегенә игътибарны юнәлтте. Хәзрәт шулай ук, ислам кануннары буенча, кабер өстенә агач утыртырга, югары мактау билгеләрен куярга ярамаганлыгын әйтеп үтте. Авыл имамнары һәм җирлек башлыклары, үз чиратларында, бу җәһәттән үз территорияләрендә нинди эшләр башкарылганын сөйләделәр.

Васил Гарипович зиратларны төзекләндерү буенча районда махсус программа булдыралачагын белдерде. Район башлыгы киңәшчесе Галимҗан Зарипов җитәкчелегендәге комиссиянең шушы көннәрдә авыллардагы мәңгелек йортларның торышын карарга чыгачакларын әйтте.