Мәктәпләрдә һәм бакчаларда акча җыйсалар – район прокуратурасына хәбәр итегез

автор, 3 октябрь 2014 - 07:49

457

Район прокуратурасы мәгариф оешмалары эчәнлегендә законнарның үтәлүен тикшерде. Чара барышында беренче чиратта балалар бакчасы һәм мәктәп ихтыяҗлары өчен ата-аналардан мәҗбүриләп акча җыю, аны максатчыл булмаган рәвештә файдалану фактларына игътибар ителде. Чөнки мәгариф учреждениеләрендә хәйрия ярдәме исеме астында ата-аналардан акча җыю очраклары кабатланып тора. Тикшерү вакытында мондый кырын гамәлләр районның да ике бакчасында һәм бер мәктәбендә ачыкланды. Закон бозуны төзәтергә кушып район мәгариф бүлеге башлыгына кисәтү хаты җибәрелде, гаепле дип табылган өч хезмәткәр дисциплинар җаваплылыкка тартылды.

Ел башыннан бүгенге көнгә кадәр район прокуратурасына мондый очраклар буенча гражданнардан шикаять хаты кермәде. 2013 елда исә шундый 1 мөрәҗәгать каралган иде.

Мәгариф учреждениеләрендә коррупция гамәлләрен булдырмау максатында район прокуратурасы киләчәктә дә эш алып барачак. Гражданнар шикаятьләрен прокуратураның үзенә килеп (адресы: Яр Чаллы шәһәре, М.Җәлил проспекты, 52нче йорт (ГЭС бистәсе, 8/4 йорты)), 71-31-33 телефоны аша яки tukayprok@mail.ru электрон адресына җибәрә алалар, дип хәбәр итә район прокуроры ярдәмчесе Рөстәм Яхин.